تعبت اوى بجد كل يوم ب راى جديد لحد ما خلاص جالى اكتئاب ثانوى تعليمى بحت
ايوة عايزة اطلع صحفية ودستورية حتى الزفت النخاع بس نفسى اكون حاجة جمب الصحافة اتسند عليها يوم ما افلس
اخدت حصتين تاريخ تمااااام كدة كويس كمان شوية قلت لا التاريخ هايجبلى تخلف عقلانى رهيب من كتر الدش والحفظ
كيمسترى احلى ع الاقل افكر وانا احب اشغل مخى
ماشى طيب يا بنت الحلال اتوكلى على الله واديها كيمسترى
اصحابى متقدمين عنى ب تلت حصص واول مرة اروح الدرس معاهم الراجل لاااا ماينفعش يا حلوة اتاخرتى كتير
روحت و انا مش شايفة الطريق نهائى بعيط حسيت انى ضاااااااايعة جدااااااا
واليوم دة كان يوم اتنين عندى فيه تاريخ وكيمسترى الاتنين سوا اه والله
بعديها هديت نفسى واخدت الموضوع تحدى وعند يا اما كيمسترى يا اما فلا وعنها ومامتى نزلت تانى معايا
وظبطت معاد مع الاسيستانت بتاع احمد شمس مستر الكيمسترى اللى مالف كتاب المعلم كيمسترى على سن ورمح
يمكن كنت غبية لما اخترت الكيمسترى عوضا عن التاريخ المسالم المضمون
بس انا واخداها تحدى و ان شاء الله ادوس فيها يعنى
ع الاقل هافكر مش هكون بس بحقن مخى ب كلام فاضى و نصه مش مظبوط
يعنى حد عارف يعنى مش يمكن يكونوا بيلخبطوا ف التواريخ
دة ع اساس انى كنت هاحفظها يعنى
وانا الوقتى هاروح اقابل وحش الكيمسترى المرعب
وارفع يدى ابتهالا الى الله
يا رب استر
5 comments:
هههههههههه
بس نفسى اكون حاجة جمب الصحافة اتسند عليها يوم ما افلس
فعلاً جامده
بس أنا متهيقلى إنهم بينصبوا مش فى التاريخ وبس دا فى كل حاجه
واحد صاحبى خريج علوم وطبعاً عاطل ما علينا من دى
بيقولى أول ما دخلوا الكليه لقوا كلام غريب معجبهمش بيسألوا الدكاتره قالولهم لا إللى أخدتوه فى الثانويه ده حاجات خلاص معدش حد ماشى بيها فى أى حته فى العالم فيه كلام جديد طلع
صباح الخير
ربنا معاكى يا رنا ويوفقك يارب عشان تلاقى حاجة تتسندى عليها ههههه قال تتسندى عليها قال المهم زاكرى كويس وربنا يوفقك وتنجحى ان شاء الله وتدخلى الكلية اللى انتى عاوزاها
اممم ..
شوفى يا ستى أنا هاتكلم معاكى فى موضوعك من زاويتين ..
إنى بتدرب فى الصحافة و تقريبا بيقولوا إنى صحفية
ثانيا .. إنى كنت باخد كمسترى
....
أولا..فعلا الصحافة ما بتأكلش عيش ..و المرتب قليل جدا بالنسبة للمرمطة و البهدلة اللى هاتشوفيها ..
الصحافة مش سهلة أوى على فكرة يعنى ..عايزة حد يحبها أوى أوى أوى
بس الصحافة ليها ميزة ..إنها مابتشتطرش إنك تكونى خريجة إعلام ولا حتى درستى إعلام ..دى بتعتمد على الموهبة ..
يعنى سيبك من حكاية أدبى و علمى و الكلام ده فى مجال الصحافة ..
اللى عنده موهبة و فرصة هايدخل فيها
...
أما الكمسترى
لأ ماأظنش إنك أتأخرتى ..
إذا كان أنا كنت متأخرة أكتر منك فى الفيزياء أيام ثانويتى ..و المدرسين قبلونى عادى ..
الكيمياء فى الأول بتبان رخمة وتلمة ..بعد كده ..بجد هاتحبيها
أنا جبت فيها 49.5 من 50
من كتر ما كنت بجبها ..و كنت براجعها فى الأجازة كمان لما بكون زهقانة
...
بس بينى و بينك ..هى بتعتمد على المدرس
نقى المدرس الصح
و سيبك من حكاية المعلم الكبير بتاع الكيمياء
بعض من الناس دى بيبقى بالونة ع الفاضى
...
و فى الاخر يا رنا ..أنا اكتشفت ان كل الطرق تؤدى إلى روما
المهم تدخلى حاجة بتحبيها و هاتدى فيها
...
بس كده
:)
رنا صديقتى الصدوق
الكيمسترى فعلا ماده ممتعه واحسن والله من التاريخ والدش على الفاضى ده
مش عايزه احبطك واقولك انه علمى او ادبى كله زى بعضه مرمى على الرصيف
بس هقولك ربنا معاكى يارب وتبقى حاجه انتى بتحبيها
بس ابقى افتكرينى
سلام يا قمر
انا مش باحب التاريخ
ومابحبش الادبي
خليك كيميا
والله دماغك جامده وييجي منك
على فكره الثانويه ينطبق معاها المثل اللي بيقول ما محبه الا مابعد عداوه
بمعنى ان الماده اللي بتحسي انك كارهاها ف الاول ومقلّقه منها هي اللي انشاء الله تجيبي فيها درجات نهائيه
وعلى راي مابيقولوا
الموضوع سهل بجد
انتي فاكراها كيميا !!!!!
Post a Comment