لو سمحت......ممكن تحضنى جامد
وتوشوشنى بهمس مش راح افهم نصه بس بيطمنى
طيب.....ممكن تسيبنى اعيط على كتفك
وتطبطب على ضهرى بحنية ذيادة
وتجيبلى شوكلاته بالبندق اللى انا بحبها
طيب ممكن تحكيلى حدوتة زى زمان
وتقرالى قرآن على راسى علشان محلمش بكوابيس
ممكن تحكيلى عنك وعن ستى وعن سفرياتك الكتيرة
ممكن تقولى انت بتحبنى قد ايه وماتقوليش قد الدنيا علشان اصدق
وكمان تقولى ليه انت كبير اوى وانا صغيرة اوى
وازاى انا كدة شبهك اوى
طيب ممكن نروح نجيب لبن سوا
وتشيلنى وتعدينى الشارع
وتجيبلى ايس كريم ببسكوتة
وكمان تعالى ننفخ البلونة
ولما تفرقع تعملى منها براقيق صغيرة
بابا حبيبى ممكن تفضل حاضنى اوى كدة شوية كمان
وتخلينى اعيط على كتفك تانى
10 comments:
أولا
الف مبروك على النحاج
ودايما بالتوفيق
ثانيا
مبروك على افتتاح البلوج
ثالثا
ماكنتش متصور ان البنات بيتعلقوا بابوهم للدرجة دي وانها بتتمنى تشاركه حاجات بسيطو قد يراها الاب هايفة ابو مش مستاهلة لكنها لها اثر كبير في نفس البنت
شكرا جدا يا محترفة الشجن
مبروك على النجاح و لو انها جت متأخرة شوية
خليه يحضنك بس مش لازم تعيطى على فكرة
اكتب بالرصاص :
اولا وثانيا : ربنا يبارك فيك :)
ثالثا :
الصور خداعة بابا مبيكلمنيش من اول امبارح :(
شكرا
sharm:
ربنا يبارك فيك يا رب :)
elkamhawy :
لو قريت البوست دة هاتعذرنى جامد
http://amirahass.blogspot.com/2007/01/blog-post_07.html
انا قعدت اعيط كتير اوى لما قريته
نا قريت الكومنتس بتاعتك وزرت اللينك
انا اسف
ربنا يا رب يخليهولك
حاولي تصالحيه وهو ماهايصدق
هو لازم يكون عايز يوصلك حاجه
وانا متأكد انه بيتألم للموقف اكبر منك
صدقيني مافيش اي شئ ف الدنيا يستاهل
بالتوفيق وابقي طمنيني
ولو :
خلاص الحمد لله اتصالحنا ومن علامات الرضى عنى ان بابا خدنى وجابلى كتب لا وايه خلانى اعمله قهوة وهو قاعد بيشتغل شفت رضا اكتر من كدة
وعندك حق والله مفيش حاجة تستاهل :)))
الحمد لله
ربنا يديم الصلح والوئام
بس يارب القهوه تكون فضلت بوشها لحد ماوصلت لحسن كده الواحد يبقى مالوش وش يتكلم
ولا من غير وش
اهو كله حرق دم
يارب ف احسن حال
شكرا اوى لاهتمامك يا معلم
واحب اقلك ان كل الامور ماشية تمام و ليس هناك اى اثر لمعارك القديمة
PEASE
Post a Comment