...لا هسلم بالمكتوب

((عندما ودعتنى وهى تغنى:((تانى تانى تانى راجعين انا وانت تانى للنار والعذاب من تانى

((فرددت عليها فى نفس اللحظة :((لا هسلم بالمكتوب ولا هرضى ابات مغلوب

الله يرحمك يا حليم

...بلا تاريخ

واكتشفت ان معاد درس التاريخ اتلغى

وانا الان بلا درس بلا تاريخ بلا وطن بلا عنوان

!!يالفاجعتى

....لما درس الماث كتم على نفسى

يااااااااااااه بقالى كتير مكتبتش ودة يرجع لاسباب نفسية قهرية و ساحلية(نسبة الى الساحل الشمالى)بحتة جدا بس والله الواحد انبسط

واهو خدتلى يومين كويسين قضيتهم صياعة يوماتى ع البحر وقت الغروب

ومع انى رايحة هناك سنتحة كدة مع خالى بس كان اسبوع جامد يعنى

انا مش عارفة ليه عندى احساس انى بكتب دلوقتى عشان ف المستقبل اقول على المدونة دى مذكراتى دة لانى عندى تقريبا زهايمر درجة تالتة :(

ونفسى ادون حاجة

بس مش عارفة اقولها ازاى نفسى مش مطاوعانى قلبى مش راضى عن الكلام دة بس ما باليد حيلة انهاردة يوم تاريخى لازم ينكتب عنه

ايوة...انهاردة اول درس ليا فى حياتى الثانوية المجيدة

اه والله

من كام ساعة انا كنت فى ذلك السنتر القابع فى ذلك المكان الكئيب القريب من المنزل و اللذى له سلالم بالظبط شبه سلالم الخدامين

زى السلالم بتاعة الحرامية كانى رايحة ارتكب جريمة نكراء

كنت رايحة كانى رايحة رحلة بالظبط

وغادة (صاحبتى) ماشية جمبى متنحة دة مع الاعتبار طبعا انها كانت لسه واخدة درس كيمسترى مبقالهاش يومين يعنى معذورة والله

انا مش عارفة انا كنت فرحانة كدة ليه بجد فى سر حاجة غيريبة حقا

بس والله الماث مش وحش دة جامد جدا هو اينعم البدايات مبشرة وما خفى كان اعظم و اذل ومتنيل بستين نيلة بس هو كويس يعنى او هكذا ما اقنع به نفسى من ساعة ما نزلت من سلالم الخدامين بتاعة السنتر العجيب دة

وانا وغادة كنا متاخرين اصلا و كان قلبى حاسس اننا هانتهزق ودة اللى حصل بس مش عارفة ليه برده كنت فرحانة وقاعدة بضحك جامد اوى كدة

واللى خلانى مش على بعضى بجد اكتر ماسيدج غريبة جاتلى من الاء بنت خالى بتقولى فيها ان الريس مات اكلينيكيا الخبر اتذاع ع الحرة

انا ساعتها مش عارفة حصلى ايه بس فجاة كدة بقيت بردانة جامد بعد كدة بقيت برتعش والدنيا حر اه والله

ولقيت نفسى بعيط اكيد دموع فرحة يعنى هاعيط ليه والكحل ساح وبقى شكلى عرة و الراجل المستر عمال يبصلى وانا بضحك واعيط ف نفس واحد ومش قادرة ابطل لحد ما الحمد لله هديت كدة وركزت بس مكنتش برده مركزة خالص الفرحة عمتنى

وغادة كانت هاتقتلنى لانها مش عارفة تركز

ولما خرجت برا بقى تقريبا كنت بصوت ف الشارع

بس الى الان محدش اكد ع الخبر يا جدعان فوقونى من الفرحة ف صرفت نظر عن الموضوع

يعنى ثانوية عامة وشائعات كمان مبقتش عيشة بقى

والى ان افتح الملزمة واذاكر ربنا يهدينى بقى

:)

واه عارفة ان الصورة اللى فوق ملهاش لازمة بس اعمل ايه مش لاقيه حالجة تعبر عن الحالة المدرسية الثانوية المقرفة دى

بس يلا بقى جت كدة

بس

!!!ايه يعنى...هه؟

ايه يعنى لما امشى وسط الشارع و انا ف ايدى اليمين كوز درة لسه اخضر ب طينه ناوية اسلقه

و ف ايدى الشمال جورنان الدستور بتاع انهاردة وروايه عبير جديدة

و شبشب اسود

ايه يعنى....هه؟؟! ايه يعنى انا حرة

***

اللوحة لسوزان عليوان

البنت الشلبية

جالسة لا يشغلها شىء سوى التطلع الى المرآه تلطخ وجوهها بشتى انواع ال make up

حتى اصبح المنظر العام يوحى ببالتة الوان تمشى على قدمين خلفيتين

....هكذا هى تشعر بالثقة بالنفس وتعتقد انها جميلة..فلتعتقد اذا كيفما شاءت

كم شعرت بالشفقة عليها وعلى وجهها المسكين المرهق

.....واليوم عندما نظرت الى عينيها ذات الجفن الاحمر والازرق و الماسكرا السوداء الكثيفة

انا (بابتسامة بجد مش من باب الواجب) :الله يا بنتى فنانة والله

حُب.....بمزااااااج

انه الحُب سيدى...حُبك

طعن لا ينقطع...فى القلب

وكل شىء يبعث على الخوف

خوف ممتزج بدخان نرجيلتك

وقهوتى الفرنسية بطعم البندق

ولوحة لبيكاسو معلقة على الجدار

عشق بلا حدود.....

عشق الى النهاية

بل..الا نهاية وما بعدها

لكن..لن اكُف عن ادمانك انا

you will see!!

سأبقى رغم دخان نرجيلتك

وحُبك الممزوج بقهوتى

حُب....بمزاااااااج

حاجة سمباتيك خالص فعلا فعلا يعنى

عشان بس محدش يقول عليا نكدية وكئيبة واتمة ورخمة و عايزة قلمين

يااااااااااااااااااا بنى ادمين

على فكرة

انا مش فرحانة بس انا طااااااااااااااااايرة

سبحانك يا رب سبحانك فعلا يعنى امبارح كان مكتوب على وشى مخنوقة وحاسة ان فى حاجة محشورة ف زورى

دلوقتى يا سلاااااااااااام حوشى دموعك يا آمال (بحب الفيلم دة وملوش علاقة بالموضوع بس عادى بقى) انا مش قادرة اصدق ان النحس اتفك وانى خرجت لا بجد مش مصدقة هو انا خرجت ولا اضغاص ناس مخنوقة ومش طايقة نفسها

ايوة ايوة...ماما برا اهى وبتاكدلى انى خرجت من باب الشقة لسه راجعة حالا حالا يعنى مش هزار

روحت سيتى ستارز مع بنت خالى قعدت اتمشى لحد ما رجلى اتعورت من الساعة سابعة المغربية وانا بمشى على رجليا لحد ما ورمت

بس مع الخنقة والقرف والاكتئاب اللى كنت عايشاهم طول الاسبوع الفقيع دة

اكتشفت ان اليوم بتاع انهاردة احسن يوم مر عليا ف ام الشهر دة كله

كنت ماشية ابص ع الناس كانى ماشية ف وسط البلد ودة احساس بيجيلى كل ما اروح سيتى ستارز اصلا كل الناس هناك كل الجنسيات بحس ان مصر احُُُُُُُتلت يا جدعان

ولما جينا نروح بقى

روحنا مشى بنت خالى كانت عايزة تاخد تاكسى بس على مين

مع انى كنت تعبانة موت بس مفيش احلى من المشى كدة بالليل وانت عمال تكنسل على باباك ومامتك و منفضلهم خالص

بكل برود الدنيا كلها

وفضلنا نغنى ونضحك ونهيس ويا حنة يا حنة يا قطر الندا ويا سمباتيك خالص يا مهندم

حاجة اخر سمباتيك فعلا

انا حاسة انى مبعرفش اكتب وانا فرحانة اصلا لازم يكون فيه نكد وخنقة وناس امورة كدة ترخم عليك زى اخواتك الصغيرين كدة

انا شكلى كدة يا جماعة بدون علشان امسك نفسى متلبسة بالفرحة (ايه الهبل دة )مش مهم بقى

بالمناسبة الصورة عمولة يعنى موصيا حد يصورلى البحر وطلعت صور جامدة كدة